श्री रेणुकादेवी महाविद्यालयात “केंद्रीय अर्थसंकल्प २०२६” वर चिकित्सक चर्चासत्र संपन्न
श्रीक्षेत्र माहूर ()
येथील बळीराम पाटील मिशन, मांडवी संचलित श्री रेणुकादेवी कनिष्ठ व वरिष्ठ महाविद्यालयाच्या वतीने “चिकित्सा : केंद्रीय अर्थसंकल्प २०२६” या विषयावर दि. २ फेब्रुवारी २०२६ रोजी विश्लेषणात्मक चर्चासत्राचे आयोजन करण्यात आले होते.
या चर्चासत्रात डॉ. तुळशीदास गुरनुले यांनी अर्थसंकल्पाचे विविध प्रकार स्पष्ट करून यंदाचा अर्थसंकल्प तुटीची भरपाई करण्यावर भर देणारा असल्याचे नमूद केले. डॉ. संदीप जाधव यांनी अर्थसंकल्पीय परंपरेविषयी मार्गदर्शन केले. प्रा. अनिल दोंदे यांनी स्वस्त व महाग झालेल्या वस्तूंचे सविस्तर विवेचन केले. तज्ज्ञ अभ्यासकांनी केंद्रीय अर्थसंकल्प २०२६ मधील आर्थिक तरतुदी, विकासाभिमुख योजना, शिक्षण, आरोग्य, कृषी व सामाजिक क्षेत्रांवरील परिणामांचा सखोल आढावा घेत अर्थसंकल्पाची चिकित्सक मांडणी केली.
सदर कार्यक्रमाचे आयोजन संस्थेचे संस्थापक अध्यक्ष प्रफुल्लजी राठोड व सचिव सौ. संध्याताई राठोड यांच्या प्रेरणेने तसेच महाविद्यालयाचे प्राचार्य डॉ. विलास पाटील यांच्या मार्गदर्शनाखाली करण्यात आले. या प्रसंगी महाविद्यालयातील प्राध्यापकवृंद व विद्यार्थी मोठ्या संख्येने उपस्थित होते. चर्चासत्रातून विद्यार्थ्यांना अर्थसंकल्प समजून घेण्याची व चिकित्सक दृष्टिकोन विकसित करण्याची संधी मिळाल्याचे मत उपस्थितांनी व्यक्त केले.
कार्यक्रमाचे सूत्रसंचालन प्रा. शुभम आत्राम यांनी केले, तर कनिष्ठ विभागाचे प्रा. संजय चव्हाण यांनी उपस्थितांचे आभार मानले. केंद्रीय अर्थसंकल्प जाहीर झाल्यानंतर दुसऱ्याच दिवशी तातडीने चर्चासत्राचे आयोजन करून विद्यार्थ्यांच्या माध्यमातून अर्थसंकल्पाची वैशिष्ट्ये जनसामान्यांपर्यंत पोहोचवणारे बहुधा राज्यातील हे पहिलेच महाविद्यालय असावे, असे गौरवोद्गार यावेळी काढण्यात आले.
No comments:
Post a Comment